یاشیدلاریم

یاشیدلاریم,
داغلار باشی گوموشودو
کولک اسدی گول اوشودو
قاپیمیزی دویه‌ن روزگار
طبیعتین استهزالی گولوشودو

او سارالان یارپاغا باخ، گؤی اوتا باخ
باشیمیزدا چارپازلاشان بولودا باخ
دره‌لرده شاقیلدایان سکوتا باخ
گونوموزو گونوموزده‌ن بورج آلیریق
بوینوموزا آلماساقدا، یاواش— یاواش قوجالیریق
یاشیدلاریم,،
زامان بویو سفرده‌ییک
بیزه، اوشاق دئییردیلر سونرا جاوان،
ایندی نه‌ییک؟
گؤردونوزمو هم اود توتان، هم، سو توتان بیر الینده
او کی بیزیک.
دایانمیشیق جاونلیغین آخیریندا، قوجالیغین اولینده..
اوزوموزه— گؤزوموزه قاردا یاغیر
 گیله— گیله ، بیرم— بیرم
بعضا اولور مجلیسلرده، من، اؤزومده‌ن یاشلیسینی گؤره‌نمیرم
بو دونیایا وئردیییم آز، آلدیغیما اوتانیرام
مندن جاوان آداملارین اؤلدویونو ائشیده‌نده
قالدیغیما اوتانیرام.
زامان کئچیر، یامان کئچیر
تانیشلارین، هم یاشلارین آدلاریدا،
کهنه تئلفون دفترینده‌ن دوشور بیر–بیر
هر جیزیغدا، اوره‌ک بیر یول یارالانیر
دفتریمده تزه– تزه تانیشلارین
عنوانلاری سیرالانیر.
زامان کئچیر ، یامان گئچیر.
یاشیدلاریم, بیر واخت منی،
چاغیراردی تویلارینا، ائوله‌نردی
ایندی اونلار قیز کؤچوردور،
ایندی اونلار ائوله‌ندیریر.
یاشیدلاریم,،
آتالاری، آنالاری یولا سالدیق، یئتیم قالدیق.
بالالارا. آتالارین، آنالارین، آدلارینی قویا– قویا
بیز کئچمیشله گله‌جگین آراسیندا کؤرپو سالدیق.
آتالارا اولان سئوگی، بالالارا گلدی کؤچدو
هم سئودیک، هم–ده، سئویلدیک
بالامیزی آتا بیلدیک، آنا بیلدیک
جاوان‌ایکن عؤمور اوچون من آلتمیشی چوخ سانمیشام.
ایندی‌ایسه دئییرم کی، جاوان اؤلموش آلتمیشیندا اؤلن آتام
گاه قلخیریق،گاه ائنیریک
یاشاماقدان یاشاماغی اؤیره‌نیریک.
دیکده ائنیش آختاریریق، ائنیشده دیک
 اؤزوموزون بودره‌دیگی دؤنگه‌لرده
ائولادیمیز بودریینده دئیینیریک
دوزو بودور قوجالیریق.
قوجالدیقجا اؤزوموزه وورولوروق.
یامان دئیینگن اولوروق
هر میوه‌نی اؤز واختیندا ییه‌نده بیز شیرین– شیرین
ایندی‌ایسه دئییریک کی، دادی قاچیب میوه‌لرین
بو دوزدو مو؟
خئییر– خئییر
ایندی بیزیم دادی قاچیب آغزیمیزین.
تنگئییبدی نفسیمیز،
ائنیش بیتیب، دیک چیخیریق
عینی رنگلی سرت قایالار ساغیمیزدا، سولوموزدا،
قانقال بیتیب یولوموزدا
داریخیریق. داریخیریق.
کؤنول یاخان بیر آفتین یانیندادا، داریخماغا باشلامیشیق
قادینلاری سئوه – سئوه قادینلاردان،
بیز، قورخماغا باشلامیشیق.
جوره‌تیمیز قاچاق دوشوب قلبیمیزده‌ن
بیر آددیمی آتماق اوچون،
مین آددیملیق دوشونوروک اوزون– اوزون
امکانیمیز دالیسیجا گئده بیلمیر آرزوموزون
قلبیمیزده بیر داش کیمی دوگونله‌نیر ایسته‌ییمیز
گؤزوموزون لذتینه، حسرت قالیر اوره‌ییمیز
کؤنول دینجلیک سوراغیندا،
ایتیردیگیم عؤمور کیمی گلیب– گئدیر،یادداشلاریم.
کولکلرین قاباغیندا یانیب سؤنور
سؤنوب یانیر، یادداشیمین چیراغلاری
بعضا اولورحسرت‌ایله یاد ائدیریک
 هرساهاتی تلاتومله اؤتوب– کئچن او چاغلاری
بالالارین سئوگیسینه پایلانیریق
بعضا اولور دوردوغوموز بو ذیروه‌دن
ائنیشلره بویلانیریق. یازیق… یازیق
سؤزلریمیز سویوق، ایلیق
صحبتیمیز قیرق– قیریق
 آی جاوانلار قولاق آسین
نصیحته باشلاییریق
نصیحته باشلاییریق…


شعر: بختیار واهابزاده